नेपालमा पिसिआर परीक्षण पर्याप्त छ,सबै कोरोनाकै कारणले मरेका छैनन्ः प्रधानमन्त्रीका सल्लाहकार भट्टराई

  •  
  •  
  •  
  •  
  •  
  •  

काठमाडौं, साउन १८। नेपालमा पिसिआर परीक्षण पर्याप्त नभएकाले तत्काल बढाउनु पर्ने सर्वत्रबाट दवाव भइरहेका बेला सरकारी पदाधिकारीहरुले भने पर्याप्त भइरहेको दावी गरेका छन् । प्रधानमन्त्री केपी शर्मा ओलीका सल्लाहकार डा राजन भट्टराईले नेपालमा पिसिआर परीक्षण पर्याप्त भइरहेकाले आत्तिनु नपर्ने दावी गरेका हुन् ।

सरकारलाई आलोचना गर्नका लागि बोल्नेहरुले मात्रै परीक्षण पर्याप्त नभएको भन्ने गरेको तर्क गर्दै उनले अन्य देशको तुलनामा नेपालमा पिसिआर परीक्षणको अनुपात धेरै रहेको दावी गरे ।

पत्रकार ऋषि धमलासँग कुराकानी गर्दै उनले भने, “अन्य देशको जनसंख्याको अनुपातमा त्यहाँको परीक्षणको संख्या निकै कम छ, तर नेपालमा निकै धेरै भइसकेको छ ।”

अझै पनि कम परीक्षण भयो भन्नेहरुलाई उनले नबुझेका व्यक्ति वा सरकारप्रति पुर्वाग्रही व्यक्तिको संज्ञा दिएका छन् । तर चिकित्सक तथा विज्ञहरुले भने पिसिआर परीक्षणको दायर झै व्यापक बनाउदै लैजानु पर्नेमा सरकारले खुम्च्याउदै लगेको बताउने गरेका छन् ।

नेपालमा कोरोनाबाट मृत्यु भएकाहरुको संख्या पनि निकै कम भएको सल्लाहकार भट्टराईको दावी छ । प्रदेश प्रदेशमा आइसोलेसन सेन्टरहरु धमाधम खाली भएकाले चिन्ता मान्नु पर्ने वा आत्तिनु पर्ने अवस्था नरहेको उनले बताए।

पिसिआर परीक्षण बनाउनु पर्ने, कोरोना नियन्त्रणका लागि सरकारले थप कदम र सक्रियता बढाउनु पर्ने, जिम्मेबार हुनु पर्ने, भ्रष्टाचारको छानविन गरी दोषीलाई कारबाही गर्नुपर्ने लगायतका माग राख्दै भइरहेको आन्दोलनलाई उनले अनावश्यक रुपमा उचाल्ने प्रयासका रुपमा व्याख्या गरे ।

एनफ इस एनफ आन्दोलनप्रति लक्षित गर्दै प्रधानमन्त्रीका सल्लाहकार भट्टराईले भने, “सरकारलाई बदनाम गर्ने नियतका साथ केही पात्र तथा समूहलाई उचाल्ने काम भइरहेको छ ।”

उनले उनीहरुको कडा आलोचना गर्दै आक्रोस व्यक्त गरे । आन्दोलनकारीहरुको भूमिका गैह्रजिम्मेबारपूण भएको टिप्पणी गर्दै सल्लाहकार भट्टराईले अहिले सरकारको विरोधको आवश्यकता र औचित्य नै नभएको बताए ।

Leave a Reply

Your email address will not be published. Required fields are marked *